والله ثم والله أن الواحد ماله نفس ولا خلق ولا حيل يتابع أخبار هالأيام … عندي أحساس اننا وصلنا مرحلة نحش في بعض أبرك من الحديث في المجريات السياسية الطافحة والمتعفنة على السطح السياسي …
أولاً: الاعضاء
قبل كنا نتطنز على القلاف وأسلوبة الهمجي في مجلس الأمة ضد الاعضاء .. واليوم أعدى الباقي وصارت مهاوش وسب … وألتقيت أمس مع وفد من البرلمان الأوروبي كان حاضر جلسة الشتم …. شهالحظ اللي حضروا فيه الجلسة هذي بالذات .. أحس المترجم قام يترجم جلسة طرح الثقة من باب الترقيع للموقف ..
ثانياً : الحكومة
وبعدين باطه جبدي الحكومة … تسوي استراتيجية وخطة تنمية ( غير مستدامة ) ويوم الاعضاء وافقوا عليها وحددوا الميزانية وانتهوا .. اجتمعوا مع قياديي الوزارات عشان يشرحون لهم الخطة ويوجهونهم نحو تحقيقها : ) … يعني مادري هذول قياديين ولا مقاولين ,,, مو المفروض يتم النقاش معاهم قبل الخطة ؟
ثالثاً: الشعب
شدعوة عاد الشعب الحين صاير الملاك الحائر بين الشياطين … استغفر الله بالشوارع يسابقون بعض … بالأسواق مهاوش وتحرش … بالدوامات زلق ببعض … بالنت فضايح ببعض وسب مسابب …
قبل لا أختم … تذكرت اني كنت بكتب مقال قبل تصويت طرح الثقة وعلاقته بحكم طلال الفهد بس ماكان لي خلق واعتقد صارت مفهومة بعد التصويت ومثل ماتوقع الجميع … خاصة بعد أن صوت سعدون حماد مع الوزير ومرزوق ضد الوزير
